Samræður eða einræður

Ég er alveg skæð með það að tala við sjálfa mig í tíma og ótíma. Ef ég kvíði fyrir einhverju undirbý ég mig gjarnan í huganum undir þær samræður og svara eins mér þykir líklegast að viðmælendur muni svara. Ég verð oft svo niðursokkin í þessar samræður að ég átta mig ekkert á að ég er farin að tala upphátt. Á sama hátt ræði ég iðulega við fjölskyldu eða vini í huganum og það er alveg jafnt um jákvæða og góða hluti eins og erfiða. Auk þess á ég ákaflega auðvelt með að halda uppi samræðum við sjálfa mig og rökræði af mikilli snilld um hin ýmsu málefni, allt í huganum. Þegar ég svo slysast til að segja eitthvað upphátt getur það verið afskaplega vandræðalegt og það hefur iðulega komið mér í koll. Í morgun t.d. var ég stödd niður í Kópavogsdal og var búin að halda uppi hörkusamræðum við sjálfa mig um heimspeki á göngunni. Á leið fram hjá fótboltavellinum fullyrti ég fullum rómi: „Þetta er hin versta hugsanavilla og alger rökleysa." Einhver mannvesalingur sem átti leið þarna um rak upp stór augu og horfði hvasst á mig. Ég reyndi eftir bestu getu að klóra í bakkann og hvæsti á hundvesalinginn sem skondraðist í kringum mig: „Já, þetta gengur alls ekki upp hjá þér, Freyja mín." Maðurinn hljóp við fót eins langt í burtu frá mér og hann komst.

Athugasemdir

[Guðríður Haraldsdóttir, 31.5.2007 kl. 20:58]

Hahhahahahahaah! Snilld! Hefði viljað vera fluga í tré þarna nálægt!

[Guðný Anna Arnþórsdóttir, 31.5.2007 kl. 22:01]

Yndislegt! Hefði viljað vera flugan við hliðina í trénu....

[Heiða Þórðar, 31.5.2007 kl. 23:09]

Verð nú bara að skjóta því hér að og er algjörlega færslunni þinni óviðkomandi. En sonur minn var að glugga í blaðið þitt sem lá á stofuborðinu. Hann sagði: -vá mamma, cool blað! það er sko complement frá honum komið Steingerður. Tölublaðið var annars mjög flott sem aldrei fyrr. Til hamingju.

[Jenný Anna Baldursdóttir, 1.6.2007 kl. 01:16]

Þarf ekki að vera fluga í nálægð þú lýsir þessu svo asskoti vel sjálf.  Takk fyrir mig.

[Katrín Snæhólm Baldursdóttir, 1.6.2007 kl. 20:01]

Það er bara eitthvað að fólki sem talar EKKI við sjálft sig....vildi bara að ég hefði ritara se skrifaði mínar frábæru samræður við sjálfa mig niður og gæfi þær svo út. Ég er aldrei vitrari en þegar ég rökræði við mig...hehe.