Sterastríðið í Neðstutröðinni

Dóttir mín hefur í vetur þjáðst af þurrkexemi í andliti og frostið í janúar jók mjög á þjáningar hennar. Við fengum þær upplýsingar hjá lækni að auðvelt væri að eiga við þetta með tiltölulega mildu sterakremi sem fæst lyfseðilslaust í apótekum. Við keyptum auðvitað umsvifalaust túpu en urðum fremur undrandi þegar í ljós kom að tíkin Freyja sótti stíft í sterana og ef túpan lá einhvers staðar á glámbekk greip hún hana umsvifalaust og nagaði í sundur. Ótótlegar leifar af áltúpunni fundust svo einhvers staðar í íbúðinni og við forsjármenn tíkurinnar urðum að hlaupa í næsta apótek eftir nýrri túpu handa arfareiðri ungri stúlku. Þegar túpunum, sem fóru forgörðum á þennan hátt, fór fjölgandi hófst mikið stríð við að halda tík og túpu sem lengst frá hvor annarri. Túpunni var komið fyrir hátt uppi í hillu inni í herbergi og herberginu harðlokað væri þar enginn íbúi. En allt kom fyrir ekki. Stundum gleymdist að henda túpunni í hæstu hæðir og iðulega var herbergið skilið eftir opið meðan skotist var í sturtu og þá var gula hættan ekki sein á sér að skjótast inn og ná sér í eitthvað að narta í. Hún skreið síðan undir hjónarúm með ránsfenginn og næst þegar sópað var í svefnherberginu birtust tætingslegar túpur, tappar og önnur sönnunargögn. Ég hélt hins vegar að með hækkandi sól og ögn hlýrra veðri færi að draga úr þessari óværu hér á bæ en öðru er nær. Í morgun birtist dóttir mín á þröskuldinum hjá mér og sagði með hyldjúpri ásökun í augunum: Hefur þú fundið einhverjar ónýtar sterakremstúpur nýlega. Ég finn nefnilega ekki sterakremið mitt og ég þarf á því að halda. Nú þori ég ekki að sópa svefnherbergisgólfið. P.S. Fyrir Svövu systur og aðra dýraverndunarsinna. Það er enga breytingu að sjá á tíkinni þrátt fyrir að hafa innbyrt ómælt magn af sterakremi. Hún hefur ekki þykknað, skapstyggð er ekki til í henni og hvergi vottar fyrir aukahárvexti. Rödd hennar hefur heldur ekki breyst.

Athugasemdir

[Heimir Lárusson Fjeldsted, 24.2.2007 kl. 12:01]

"Hún hefur ekki þykknað, skapstyggð er ekki til í henni og hvergi vottar fyrir aukahárvexti. Rödd hennar hefur heldur ekki breyst. "

En er hundur í´enni?

[Guðríður Haraldsdóttir, 24.2.2007 kl. 18:05]

Hhahahhaha, Freyja hrekkjusvín! Vitlaus í sterakrem, þetta er eitt af því fyndnara sem ég hef heyrt. Gott að hún finnur ekki fyrir einkennum!!!

[Svava S. Steinars, 25.2.2007 kl. 19:12]

Hahahah, ég hef reynslu af sérstakri matarlyst Freyju.  Hún hakkaði m.a. í sig tjalddýnuna hennar Hildu einu sinni og breytti dömubindum í frumeiningar sínar.  Freyja er örugglega mjög góð í húðinni eftir þessa steranotkun

[Steingerður Steinarsdóttir, 26.2.2007 kl. 09:07]

Ég er búin að bíða alla helgina eftir að geta svarað Heimi. Ég get nefnilega ekki skrifað athugasemdir í tölvunni heima. Þetta er makki með Safari vafra og hann neitar að birta athugasemdir við skrif mín hér. Jæja en að svarinu. Freyja er fremur hundsleg en enginn hundur í 'enni svona venju fremur og sennilega verður að flokka það undir hundaheppni miðað við steramagnið sem hún hefur innbyrt.

[Sigurveig Eysteins (IP-tala skráð) 27.2.2007 kl. 00:53]

ég held að þú ættir  að koma henni í vinnu hjá póstinum eða tollinum    sivva

[Steingerður Steinarsdóttir, 28.2.2007 kl. 14:01]

Æ, mikið var gaman að heyra í þér Sivva mín. Að sjálfsögðu ætti ég að reyna að fá vinnu fyrir hundinn hjá tollinum. Að minnsta kosti er öruggt að tíkin finnur næstu sterasendingu.