Konur í sókn

Eva Halldóra útskrifaðist stúdent á laugardaginn. Það var ekki laust við að mér súrnaði í augum, eins og Skarphéðni í brennunni forðum, þegar ég horfði á dóttur mína ganga yfir sviðið með stúdentsskírteinið sitt í höndunum. Það hitti mig einnig í hjartastað að sjá allar þessar stúlkur sitja á sviðinu. Að undanförnu hef ég verið að vinna að 19. júní og talað við tvær konur vegna þess. Önnur er 96 ára gömul og stóð á Austurvelli árið 1915 með móður sinni og fagnaði kosningarétti íslenskra kvenna. Hin er 88 ára og man eftir að hafa séð Ólafíu Jóhannsdóttur á götu í Reykjavík en sú var önnur tveggja kvenna sem fyrsta fengu að stunda nám við Menntaskólann í Reykjavík. Ólafía lauk reyndar ekki stúdentsprófi en það gerði hin. Báðar þessar fullorðnu konur lögðu áherslu á að menntun væri lykillinn að jafnrétti og báðar þráðu að læra meira en þær gátu leyft sér. Auk þess að vera í meirihluta stúdentsefna voru konur einnig í meirihluta afburðanemenda. Af tíu efstu nemendum við þessa útskrift Verzlunarskólans voru átta stúlkur og tveir drengir. Þetta er stórkostleg breyting sem vonandi veit á gott hvað jafnréttisbaráttuna varðar.

Athugasemdir

[Aðalheiður Magnúsdóttir, 29.5.2007 kl. 11:19]

Til hamingju með hana. Maður verður svo glaður þegar þessum áfanga er náð. Er hún búin að ákveða hvað hún ætlar svo að taka sér fyrir hendur?

[Sigurlaug B. Gröndal, 29.5.2007 kl. 13:11]

Innilega til hamingju Steinka mín. Þetta er stór áfangi og nú eru henni allir vegir færir í áframhald. Menntun er lykillinn það er alveg rétt og einmitt sú fjölgun ungra kvenna sem ljúka framhaldsskóla með súper-árangri og demba sér svo í háskólanám er stórkostlegt.

[Jenný Anna Baldursdóttir, 30.5.2007 kl. 12:20]

Til hamingju með dótturina.