Steingerður Steinarsdóttir

18.1.2008 | 10:12

Munurinn á að ganga og sitja

Í Fréttablaðinu á mánudag var lítill fréttamoli fyrir neðan mynd af manni mjög svo uppteknum við að veiða sér fisk gegnum vök á Moskvuánni. Fyrir neðan myndina stóð: Þessi maður sat í hægðum sínum ... Ég veit ekki með ykkur en mér finnst þetta frekar ósmekklegt orðalag. Mér finnst fólk geta gengið í hægðum sínum milli staða en að sitja í þeim er ansi sóðalegt.

Flokkur: Bloggar | Facebook

Athugasemdir

Hehehhe, þetta er nú ekki í fyrsta skipti sem það orðalag sem haft er í frásögnum sé algjör ambaga. Sumir textasmiðir og "fréttamenn" hjá dagblöðunum í dag eru farnir að hljóma eins og "Bibba á Brávallagötunni" sem var og hét hér um árið í útvarpinu. Einn þekktur Flateyringur kallaður "Búbbulínan" sneri málsháttum og sögnum á snilldarhátt en af fyllstu einlægni. Einn þeirra var slagorð Þjóleikhúskjallarans á sínum tíma, "staður á undan sinni framtíð", en hann sagði að þessi eða hinn hafi verið á undan sinni framtíð. Einnig hafði hann sagt við annan mann vegna mikils hávaða sem hinn sami olli, hvort hann ætlaði að "sprengj í honum hljóðbylgjurnar"! Ótrúlegt en satt!

Sigurlaug B. Gröndal, 18.1.2008 kl. 10:34

Æj hvað ég er sammála þér. Mér finnst blaðamenn ekki vanda sig nógu mikið - kannski er tímaskorti um að kenna - en að sitja í hægðum sínum er ansi sóðalegt og hlýtur líka að vera skítkalt að sitja í þeim úti á ísnum.....

Hrönn Sigurðardóttir, 18.1.2008 kl. 10:59

hahaha sammála - frekar subbulegt að sitja í hægðum sínum. Auk þess ekki rétt að nota máltækið á þann hátt...

Linda Lea Bogadóttir, 18.1.2008 kl. 11:54

Þetta er samt jákvætt fyrir svona púka sem hlusta á orðanna hljóðan, og skemmta sér konunglega við lestur tvíræðna blaðafrétta.

Oft gaman að lesa mikla speki.

Þorsteinn Valur Baldvinsson, 18.1.2008 kl. 16:22

Það er þetta með hægðir sem líkamlegan úrgang, sem byggður er á efnafræðilegu niðurbroti eldsneytis (fæðu) og hægð sem tilbrigði af hægur, sem er einhver sem fer ekki hratt, heldur varlega og auðveldlega. - Mér til hugarhægðar hef ég hægðir góðar. Eða þannegin.

Guðný Anna Arnþórsdóttir, 18.1.2008 kl. 22:07