Vor í lofti og á legi

Vorið er komið. Á því er enginn vafi. Við Freyja gengum meðfram sjónum áðan, byrjuðum í Nauthólsvík, gengum Ægissíðuna á enda og snerum svo við. Æðarfuglinn er byrjaður að para sig en var ekki í betra skapi en svo að hann úaði á mig með reglulegu millibili sennilega til að minna mig á að vera nú ekki of ánægð með sjálfa mig. Tjaldar og sandlóur þutu um í fjöruborðinu og tíndu upp í sig prótínríkt sælgæti á borð við marflær og þráðorma. Alveg síðan Svava systir gróf upp eitt stykki þráðorm fyrir mig í fjörunni út við Reykjanesvita hefur svartur og sakleysislegur sandurinn fengið svipaða stöðu í huga mér og hryllingsmynd sem ég hef ekki séð. Ég veit að ógeðið er þarna en jafnframt að ég get forðast að sjá það ef ég bara vil. Svava taldi að þar sem ég er ákaflega elsk að náttúrunni svona yfirliett þá myndi ég fagna þeirri reynslu að sjá langt svart kvikindi iða með ótal þráðlíkum löppum. Henni skjátlaðist því ást mín á náttúrunni miðast við blóm, mjúkan feld eða fjaðrir fremur en iðandi fálmara og verur sem hafa óeðlilega snöggar hreyfingar og geta skriðið upp buxnaskálmarnar hjá manni. En hvað um það, Enginn þráðormur var sýnilegur í blíðunni í dag og hafa sjálfsagt flestir lent beint í fuglsmaga. Virðulegur toppskarfur sat á steini og snyrti fjaðrirnar. Þeir eru svo sætir. Þeir minna alltaf einna helst á embættismenn í gömlum en vönduðum jakkafötum þar sem þeir sitja ábúðarfullir á þangþöktum skerjum. Mig langar oft til að stoppa og bíða bara til að sjá hvort þeir hefji ekki upp raust sína og sendi einhvern merkan boðskap frá þessari hentugu staðsetningu. Já, hvergi sést vorið betur og fyrr en niðri við sjóinn.

Athugasemdir

[Hugarfluga, 16.3.2008 kl. 19:41]

Afskaplega vorleg færsla. Ég fékk stemninguna alveg beint í æð.

[Berglind Steinsdóttir, 16.3.2008 kl. 21:08]

Vá, þú hlýtur að fara í sérstakar fuglaferðir sem leiðsögumaður. Geturðu ekki boðið okkur njólunum sem þekkjum ekki ... svan frá álft - eða himbrima frá lómi - í skoðunarferð um Ægisíðuna?

Skráðu þig svo í Hellisheiðarvirkjunarferðina 3. apríl (ég lofaði að hnippa í þig)! Og taktu Láru Hönnu með. ... Vinsamleg tilmæli.

[Guðný Anna Arnþórsdóttir, 16.3.2008 kl. 22:19]

Ég sé að þú ert alveg að taka vorið inn í gegnum náttúruna eins og ég! Stundum er svo gott að strútsheilkennið eins og ég, t.d. þegar maður hugsar um marflær og þráðorma.  Slíkt heilkenni getur hjálpað manni talsvert við að eiga við lífið og tilveruna ....

[Sigurveig (IP-tala skráð) 17.3.2008 kl. 01:07]

Þetta var ekki að virka fyrir mig... Á ég von á ormum upp skálmarnar  næst þegar ég fer í fjöruferð, mér sem finnst svo notalegt að leggjast í fjöruna, loka augunum og hlusta á náttúruna, ég hef varan á mér næst, annars er alltaf skemmtilegt að lesa eftir þig, þú gerir það svo skemmtilega

[Svava S. Steinars, 17.3.2008 kl. 09:12]

Sæl Steingerður mín.  Þarna var reyndar um burstaorm að ræða :)  En þráðormarnir eru allsstaðar, litlir glærir og skemmtilegir.  Kannski best að gefa ekki frekari upplýsingar.

[Heidi Strand, 17.3.2008 kl. 20:48]

Skarfar minna mig á svartstakkar