Moldarbrúnn hundur og þrautfúl kona

Ég gekk á Úlfarsfellið með Freyju á sunnudagskvöldið. Allt var þurrt og þokkalegt og ég skemmti mér hið besta allt þar til við vorum nánast komnar niður.  Tíkin var laus því lítið var um mannaferðir á fjallinu og skondraðist við hlið mér og á undan mér. Skyndilega sé ég hvar tíkin stoppar á brekkubrún, sperrir eyrun og er mjög spennt í útliti. Ég hélt að þarna hlyti að vera annar hundur á ferð svo ég flýtti mér af stað til hennar og kallaði. Hún sinnti því í engu en hentist af stað og beint ofan í moldug hjólför sem voru full af drullu. Þar óð hún fram og aftur hin hamingjusamasta á svip og fékk greinilega mikið út úr þessu leirbaði. Ég gargaði hins vegar á hana að koma sér þarna upp úr og það strax. Sú gula hlustaði ekkert á mig og tók sinn tíma í baðið. Það var skolbrúnn hundur sem hvergi var hægt að koma við sem fór upp í bílinn minn að fjallgöngu lokinni. Svo maður taki nú undir með Viktoríu heitinni Bretadrottningu þá var oss ekki skemmt. 

Athugasemdir

[Þorsteinn Valur Baldvinsson, 27.5.2008 kl. 18:02]

Æi vertu góð, taktu Freyju bara með í leirböðin í Hveragerði, örugglega gaman hjá ykkur báðum þá.

[Hrönn Sigurðardóttir, 27.5.2008 kl. 18:59]

brrrrrrr kannast við þetta..........

Ekki skemmtilegt! 

[Jenný Anna Baldursdóttir, 28.5.2008 kl. 07:49]

Svona, svona Steingerður, þetta er eflaust bara byrjunin á skemmtilegu "drullusumri" hjá Freyju.

Vopnvæðist.

[Linda Samsonar Gísladóttir, 28.5.2008 kl. 09:38]

Svona er þetta með blessuð dýrin okkar; oftast hefur maður af þeim yndi, en örsjaldan armæðu.  Hugsaðu um yndisstundirnar, þá verður þetta lítilfenglegt í samanburðinum:)

[Heiða Þórðar, 28.5.2008 kl. 20:40]

Þekki nokkrar þurrar kerlingar

[alva (IP-tala skráð) 29.5.2008 kl. 01:25]

 það hefur verið alveg drullugaman hjá hvutta    

[Sigurlaug B. Gröndal, 30.5.2008 kl. 21:03]

Því trúi ég mín kæra að þér hafi ekki verið skemmt. Þau eru ferleg þegar þau taka upp á svona löguðu. Þeim finnst þetta svo hrikalega gaman ............en ekki okkur! Þú átt alla mína samúð.

[Linda Lea Bogadóttir, 1.6.2008 kl. 10:56]

Hehe
Njóttu dagsins

[Svava S. Steinars, 1.6.2008 kl. 21:01]

Heheh, ég man eftir fleiri svipuðum atvikum þar sem sami hundur var í aðalhlutverki.  Litli subbuhundur