Vaðandi í villu og svíma

Við systur, Svava og ég, fórum með Freyju í gönguferð uppi í Heiðmörk í dag. Við gengum gleiðgosalegar inn í skóginn og vorum ekki lítið sperrtar og ánægðar með okkur í góða veðrinu. Gleðin fór þó eitthvað heldur að súrna þegar við vöknuðum upp við vondan draum og áttuðum okkur á því að við höfðum ekki hugmynd um hvar bíllinn var. Við vorum búnar að ganga heillangan hring og komnar á veg aftur en bíllinn var hvergi nálægur. Við vissum að við höfðum lagt við Furulund og nú hófst leit að honum á korti. Jú, þarna var hann og við héldum af stað. Hvort við vorum að fara í rétta átt eður ei var hins vegar fullkomlega óljóst. Eftir langt labb og klór í höfðinu yfir þremur kortum römbuðum við á bílinn meira fyrir heppni en lagni. Ég vildi óska að mér hefði gengið betur í ferðamennskutímunum í Leiðsöguskólanum en ég skildi hvorki upp né niður í kortunum sem við vorum að reyna að lesa á þar.

Athugasemdir

[Linda Lea Bogadóttir, 3.11.2007 kl. 21:22]

get ekki annað en hlegið að þessu... ! Ótrúlegt - Þið hafið væntanlega fengið aðeins lengri göngutúr fyrir vikið. En er ekki Heiðmörkin æðisleg. Var að hugsa um göngu þar á morgun - ef veður leyfir - Eins gott að ég týni ekki bílnum.

[Guðný Anna Arnþórsdóttir, 3.11.2007 kl. 23:57]

Ég er nú eiginlega fegin að heyra að einhver annar en ég getur lent í þessu líka. Ein af mínum fötlunum er áttavilla mikil, þ.e.a.s. ef ég hef ekki Hólmatind fyrir framan mig, eða að ég get ekki horft beint af augum á Esjuna. Ég villtist einu sinni í 3 klukkutíma í Heiðmörk, í þoku og rigningu. Það var fyrir farsímadaga. Og ég var í kompaníi með yngri frænku minni, sem grét af heimþrá og eftirsjá eftir lífinu, sem hún hélt að hún væri um það bil að kveðja. Ó, hvað við vorum sorglegar.

[Marta B Helgadóttir, 4.11.2007 kl. 14:19]

Nú er bókaspjallið komið í gang á síðunni minni, um bókina Sendiherrann. Endilega leggðu orð í belg ef þú hefur tíma.

[Linda Lea Bogadóttir, 4.11.2007 kl. 23:35]

Heiðmörkin tók vel á móti mér í dag... smá haglél en þetta er algjör draumastaður... ótrúlegt að ég skyldi ekki hafa uppgötvað þetta fyrr..

Mæli með þessu frekar en smáranum eða kringlunni um helgar...  

[alva (IP-tala skráð) 5.11.2007 kl. 01:10]

 frábærar gellurnar, vona að þið hafið verið klæddar skv. veðri þar sem þið voruð ekki með ÁTTAVITA í óbyggðunum það er kannski svona endurmenntunarnámskeið í Leiðsögumannaskólanum, þetta er frábært, sé ykkur í anda rangla þarna um hahaha