Enn og aftur af klæðaburði

Ásgeir Rúnar spyr í athugasemd hvers vegna megi ekki fjalla um klæðaburð fólks í viðtölum og því miður get ég ekki svarað athugasemdum í tölvunni hérna heima. En það sem málið snýst um er að á forsíðu nýjasta tölublaðs h-tímarits eru myndir af fólki sem stendur framarlega í viðskiptalífinu og eru viðtöl við þau inni í blaðinu. Strax og forsíðan birtist fékk ég athugasemdir, bæði hér á blogginu mínu og í tölvupósti um að forsíðan væri sexist. Ástæðan er sú að Katrín Friðriksdóttir hagfræðingur er þar klædd og stílíseruð svolítið í anda fínnar frúar á sjötta áratug síðustu aldar. Okkur fannst þetta töff og flott. Í viðtali við hana geri segi ég frá því að hún er kvenlegar og stelpulegar klædd en viðskiptakonur almennt og lýsi fötunum hennar. Inga Lind Karlsdóttir gerir það að umtalsefni í Íslandi í dag og segir að klæðaburður karlmanna yrði aldrei ræddur á þennan hátt. Ég er sjálf mikil kvenréttindakona þannig að gagnrýnin kom illa við mig.

Hins vegar er það ekki alls kostar rétt að klæðnaður karla sé ekki hluti af umfjöllun um þá. Munið þið ekki eftir Halldóri Ásgrímssyni og selskinnsjakkanum hans. Halldór var þá sjávarútvegsráðherra og ég man ekki betur en að selskinnsjakkar hafi lengi á eftir verið kallaðir Halldórsjakkar svo mikla lukku vakti jakkinn í fjölmiðlum. Nýlegra dæmi er sennilega þegar Reynir Traustason fór með Ísmanninn frá Grænlandi í verslun Sævars Karls. og dressaði hann upp. Ekki einn einasti maður kvað upp úr með það að Reynir hefði gert lítið úr þessum þykkholda erfiðismanni með því að mynda hann í Armani. Hefði ekki allt eins verið hægt að túlka það sem svo að maðurinn væri ekki nógu góður í köflóttri vinnuskyrtu og skítugum buxum. Við á h-tímarit tókum okkur líka til í febrúar og klæddum Helga Seljan virðulegan fréttamann upp eins og smástrák og smurðum súkkulaði í andlitið á honum. Enginn vorkenndi Helga og talaði um að hann hefði verið gerður að fífli. Þvert á móti. Öllum fannst mikið til um hversu glettinn og frjálslegur Helgi væri að taka þátt í þessu. Málið er að við verðum að passa okkur á að leita ekki að fordómum þar sem engir slíkir eru til staðar. Vissulega er gott að vera með augu og eyru opin og reyna að stuðla að auknu jafnrétti hver á sinn hátt en það þýðir ekki að við megum ekki leyfa okkur svolitla skemmtun.

Að lokum þá verð ég að þakka bloggvinunum stuðninginn. Þið eruð frábær.

Athugasemdir

[Jenný Anna Baldursdóttir, 19.4.2007 kl. 11:19]

Takk fyrir pistilinn.  Þetta er verðugt umhugsunarefni.  Gleðilegt sumar bloggvinkona

[Björg K. Sigurðardóttir, 19.4.2007 kl. 20:37]

Ég er búin að fylgjast aðeins með umræðunni um þetta "mál" og af því að dæma finnst mér þetta vera algjör stormur í vatnsglasi og ekkert athugavert við hvernig umfjöllun blaðsins er. En hvar er hægt að nálgast þetta blað?

[Steingerður Steinarsdóttir (IP-tala skráð) 19.4.2007 kl. 21:22]

Blaðið færðu í Hagkaupsverslunum, Bónusvídeó, Essó-stöðvum N1 og Fjarðarkaupum.

[Katrín Snæhólm Baldursdóttir, 20.4.2007 kl. 08:38]

 

Hvernig er það..mega konur ekki ráða því sjálfar hvernig þær presentera sig?

Ef Katrín er þessi týpa og klæðir sig á rómantískan og persónulegan hátt eins og henni finnst flottast og best fyrir sig má hún það þá ekki? Hefur hún ekki sannað með verkum sínum og vinnu að hún er eldklár og dugleg og sjálfstæð. Er það ekki bara það sem við viljum horfa á sem fyrirmynd sem nær frábærum árangri. Þurfum við líka að ráð því hernig hún presentar sig og klæðir svo hún falli í kramið. Hvað andskotans kram er að verða til sem aðrar konur keppast um að búa til fyrir hvor aðra. Ef þú ert svona þá ertu svona..ef ekki þá ertu ekki nógu klár, gáfuð, gefur ekki rétta ímynd fyrir hinar...ble ble ble....

Skapið bara ykkar eigin ímynd á ykkar eigin forsendum og gerið hlutina á ykkar eigin hæfileikum. Leyfið svo konum sem sýna og sanna að þær geta allt sem þær vilja og á þann hátt sem þær vilja að gera það án þess að vera alltaf að gagnrýna og röfla. Gefið þeim það kredit að þær ráði alveg við að klæða sig sjálfar og á sínum forsendum. Fáránleg þessi forsjárhyggja alls staðar.

Gleðilegt sumar.