Leitað að fordómum

Inga Lind Karlsdóttir gerði viðtal mitt við Katrínu Friðriks. að umtalsefni í Íslandi í dag í gær.  Við hér á ritstjórninni ákváðum að svara henni og birtist svarið inn á mbl.is. Svar okkar var eftirfarandi.

Vegna umfjöllunar í Íslandi í dag vill h-tímarit taka fram eftirfarandi:

Ástæða þess að klæðaburður Katrínar Friðriksdóttur var gerður að umtalsefni í viðtali við hana var sú staðreynd að hann er óvenjulegur. Hingað til hefur hefðbundin dragt verið einkennisklæðnaður kvenna í viðskiptalífinu og þær ekki teknar alvarlega ef þær kjósa frjálslegri og kvenlegri fatnað. Katrín er ung, falleg kona sem kýs að klæða sig eftir eigin smekk og sú staðreynd að hún er ekki bara tekin alvarlega heldur mikils virt hlýtur að vera ákveðinn sigur fyrir allar konur. Kvennabarátta og jafnrétti snýst um að hver og einn einstaklingur fái að njóta sín á sínum forsendum en þurfi ekki að beygja sig undir einhverjar fyrirfram gefnar hefðir eða hugmyndir til að njóta lífssins.

Hefði Ingólfur Bender eða annar karl í viðskiptalífinu mætt í viðtal í golfbuxum og strigaskóm og sagst vera þannig klæddur í vinnunni dagsdaglega því þannig liði honum best hefði það svo sannarlega verið gert að umtalsefni í blaðinu til marks um persónu sem fer sínar eigin leiðir. h-tímarit telur að með því að klæða sig eftir eigin smekk og jafnvel svolítið stelpulega sýni Katrín Friðriksdóttir að hún er sterkur karakter og líkleg til frekari afreka.

Allir viðmælendur okkar eru spurðir að því hvernig þeim gangi að sameina fjölskyldulíf og krefjandi starf eða áhugamál. Hilmir Snær fær þessa spurningu í janúarblaðinu og Gísli Örn Garðarson er í febrúar spurður hvort hann haldi að nýfædd dóttir hans muni á einhvern hátt verða til að draga úr útrás Vesturports um allan heim. Í sama blaði og Katrín er í fá Bjössi og Dísa í World Class nákvæmlega sömu spurningu. h-tímarit er jafnréttissinnað blað sem gerir sér grein fyrir að bæði karlar og konur eiga fjölskyldur.

h-tímarit kappkostar að sýna jafnréttishugsjónina í verki og bendir á að karlar og konur fá jafnt vægi í blaðinu og leitað er að sterkum jákvæðum konum til að segja frá vinnu sinni og áhugamálum.

Athugasemdir

[Ásgeir Rúnar Helgason, 18.4.2007 kl. 17:28]

Ha?

Hvað er málið?

Af hverju má ekki lýsa klæðaburði fólks í viðtali?

Einn fattlaus:

[Katrín Snæhólm Baldursdóttir, 18.4.2007 kl. 19:30]

Tek undir hvert einasta orð hérna. Katrín er bara flott og á og má klæða sig eins og henni þóknast. Mér fyndist hræðilegt ef munurinn á kynjunum..þessu kven og karllega færi að dofna eða hverfa. Ætli svona flinkheit fylgi þessu nafni???

Kona spyr sig..hmmm!

 Með varalit..takið eftir því!

[Guðný Anna Arnþórsdóttir, 18.4.2007 kl. 21:34]

Áfram Steingerður. Er svo gersamlega sammála þér í þessu máli öllu.

[Sigurveig Eysteins (IP-tala skráð) 19.4.2007 kl. 01:25]

Mjög klaufalegt hjá Ingu Lind í Íslandi í dag, vanhugsað held ég, leiðist óskaplega þessar karladragtir sem konur nota ,sem betur fer eru til konur sem þora að vera sjálfstæðar í klæðaburði. Af hverju geta konur ekki verið gáfaðar,sjálfstæðar,fallegar, og kvenlegar allt í sama pakkanum Við konur verðum ekki karlar ,eða gáfaðri þó við förum í karlaföt. Spurningar um fjölskylduhagi,og hvernig við konur förum að því að láta allt ganga upp hjá okkur ,það segjir okkur (lesandanum) hvað við (þær) erum duglegar,og það hjálpar okkur hinum, ef hún getur þetta ,þá get ég það líka. Þegar ég lít til baka þá var Inga Lind í viðtali við Völlu Matt (innlit útlit) þá var hún spurð sömu spurningar ,svo Steina það eru aðrir sem nota þessar spurningar Haltu svo áfram að vera æðisleg,gáfuð og falleg.

[Heiða Þórðar, 19.4.2007 kl. 02:34]

Ég bara hreinlega trúi því ekki að klæðaburðurinn á forsíðunni sé svo mikið sem í umræðunni! Ja, hérna hér. Að því slepptu er ég búin að ná í eintak af blaðinu og lýst frábærlega á. Hamingjuóskir um leið og ég óska blaðinu velfarnaðar

[Svava S. Steinars, 19.4.2007 kl. 11:53]

Flott svar