Steingerður Steinarsdóttir

18.3.2008 | 15:40

Heimilisofbeldi og réttarkerfið

Í morgun las ég frétt af þingfestingu máls gegn manni sem ákærður er fyrir fjórar alvarlegar líkamsárásir á fyrrverandi eiginkonu sína. Dómur er ekki fallinn í þessu máli en sennilega verður hann vægur ef dómari heldur sig við dómvenju í slíkum málum hér á landi. Mér finnst ekkert undarlegt að illa gangi að uppræta heimilisofbeldi því menn virðast ekki skilja eðli þess og kerfið þar afleiðandi ekki í stakk búið til að takast á við það. Ofbeldi af þessu tagi stigmagnast og endar iðulega með því að þessir menn drepa eiginkonur sínar. Ég man eftir tveimur þekktum dæmum um slíkt hér á landi en eflaust eru til fleiri þótt ég viti ekki um þau. Í Bretlandi hafa félagsmálayfirvöld komið sér upp áætlun þar sem þau flytja konur verstu ofbeldismannanna milli staða og fara í raun með þær eins og þá sem njóta vitnaverndar. Þetta kemur til af illri nauðsyn svo margar konur hafa fallið í valinn þar að Bretar eru farnir að átta sig á að engin rök eða venjuleg úrræði duga. Mál Mariu Ericson sem Liza Marklund skrifaði um í Hulduslóð og Friðlandi sýnir svart á hvítu hvað vestræn yfirvöld eru gersamlega skilningsvana og afllaus þegar menn eru nægilega staðráðnir í að beita ofbeldi og brjóta af sér. Ég myndi vilja að nálgunarbann væri gert að áhrifaríkari og ákveðnari leið til að setja þessum mönnum mörk og því væri oftar beitt. Það á líka að sækja þess menn til saka burtséð frá því hvort fórnarlömbin kæra eða ekki. Þeir eru stórhættulegir. Vonandi kemur að því að íslensk yfirvöld opna augun og átta sig á að við ofbeldi er bara eitt svar, boð og bönn sem framfylgt er af ákveðni og hörku.

Flokkur: Bloggar | Facebook

Athugasemdir

Ég bíð spennt eftir dómnum í þessu máli. Eitt það hrottalegasta dæmi um heimilisofbeldi sem komið hefur fyrir dómsstóla og það verður forvitnilegt að sjá hvort dómurinn verður samkvæmt því

Verð samt að segja að ég er ekki bjartsýn

Heiða B. Heiðars, 18.3.2008 kl. 15:53

Er ekki bjartsýn heldur, enda engin ástæða til.

Það er ákveðin tolerans í gangi gagnvart ofbeldi á konum sem sést á dómunum t.d.

Takk fyrir mig.

Jenný Anna Baldursdóttir, 18.3.2008 kl. 16:27

Tek undir þetta. Það verður forvitnilegt að sjá hvernig dæmt verður.

Marta B Helgadóttir, 18.3.2008 kl. 23:47

Ég kalla þetta ofbeldi á SILFURFATI eða dómstólar gefa út veiðileyfi með þessum dómum skilaboðin eru mjög skýr, það er allt í lagi að misþyrma og nauðga það verða ekki afleiðingar af ofbeldinu og þetta vita ofbeldismennirnir auðvita enda eru þeir í góðum málum með þessi lög í landinu.

Sigurveig (IP-tala skráð) 19.3.2008 kl. 01:11

Þekki ekki þetta mál, en það eru nokkrar konur á Alþingi og líka Karlar, sem hafa talað um að herða beri dóma í svona málum, hvet fólk til að ýta við þessum aðilum og hvetja þá til að rýmka um refsiramman sem Dómarar hafa, og auka þannig líkur á þyngri dómum.

Eftir höfðinu dansa limirnir, og Alþingi er víst höfuðið.

Þorsteinn Valur Baldvinsson, 19.3.2008 kl. 08:48