Allt vald spillir

Alveg er það merkilegt hvað valdið spillir manninum. Eiginlega má segja að því meira vald sem einstaklingi er gefið yfir öðrum því viðbjóðslegri verður misnotkun hans á valdinu. Þrjú dæmi um þetta eru einmitt mjög augljós okkur Íslendingum nú. Fyrst misnotkun Guðmundar í Byrginu á skjólstæðingum sínum sem er sérlega ógeðfelld í ljósi þess að um var að ræða stúlkur sem allar höfðu mátt þola kynferðislegt ofbeldi í mismiklum mæli. Það er því miður alveg öruggt að stúlkur sem hafa verið í mikilli eiturlyfjaneyslu hafa verið misnotaðar á margan hátt af bæði dópsölum og félögum sínum. Einhvern veginn finnst manni enn andstyggilegra að menn skuli geta hugsað sér að níðast á þeim sem þegar er búið að misþyrma á andstyggilegan hátt. Það er eins og sagan af kennaranum sem barði strákana í bekknum af því þeir voru hvort sem er barðir heima hjá sér. Annað dæmið er svo kynferðisbrot sem framinn voru á heyrnarlausum í trausti þess að þeir gætu ekki sagt frá og kynferðisbrotamennirnir sem Kompás veiddi í gildru en þessir menn notfæra sér sakleysi og reynsluleysi ungra stúlkna til að tæla þær til sín og misþyrma þeim. Og að lokum er það þetta hroðalega ofbeldi og viðbjóður sem viðgekkst á unglingaheimilinu á Breiðavík. Vissulega er Ísland ekki einsdæmi og alls staðar í heiminum eru dæmi um slíkt. En það gerir þetta ekki betra. Ég er farin að halda að við megum aldrei undir nokkrum kringumstæðum gefa neinum manni vald yfir öðrum því ekki er annað að sjá en það endi alltaf á einn veg.

Athugasemdir

[Guðríður Haraldsdóttir, 6.2.2007 kl. 22:17]

Það ríkir svo mikil siðblinda úti um allt! Og það er svo erfitt að greina siðblindu hjá fólki! Siðblindir eru úti um allt, og ekki síst í stjórnarstöðum. 

[Svava S. Steinars, 6.2.2007 kl. 23:55]

Já, það er nóg af misnotkun valds hér í þjóðfélaginu.  Og merkilegt hvað trúmál blandast oft inn í svona.  Hvernig trúfélög nota sér veikleika fólks sem á við geðræn vandamál að stríða til að ná í peninga.  Leiðtogar söfnuða nota uppsoðið trúarbragðarugl til að réttlæta misnotkun á konum og börnum.  Ekki allir spillast af valdi, en sumir gerspilltir leita í það.  Spurningin er, hvað meira er í gangi ?  Þarf að skoða vel allar stofnanir og samtök, svo við þurfum ekki að heyra um hryllingin eftir nokkur ár í sjónvarpinu.  Svona þarf að stöðva nú þegar.