Vorið sem kom og fór

Ég fór í göngu með Freyju í morgun í vorlegu og fallegu veðri. Loftið var svalt og á stilltum Arnarnesvognum syntu margæsir og húsendur. Sólin var farin að skína og bjart yfir öllu og ég sá fyrir mér vorhlýindi framundan. Á ljósastaur sat hins vegar bísperrtur sílamávur og hló illkvittnislega. Í fyrstu vissi ég ekki að hverju hann var að hlæja en þegar ég leit út um gluggann rétt fyrir hádegið og sá snjókomuna skildi ég að hann hafði verið að segja mér að fagna ekki of snemma. Í fyrra var ég að leiðsegja hóp Soroptimista um Snæfellsnes þann 20. júní og rútan var stöðvuð efst í toppi brekkunnar á Vatnaleið til að fólk gæti fengið sér kaffi. Þá snjóaði á okkur og fólkið stóð skjálfandi með kaffibollana íklætt lopapeysum, vettlingum og húfum. Nei, það borgar sig ekki að fagna vorkomunni of snemma hér á Íslandi.

Athugasemdir

[Guðríður Haraldsdóttir, 17.4.2007 kl. 19:23]

Það er aldeilis að þú fékkst auglýsinguna í Íslandi í dag fyrir nokkrum mínútum. Ég segi á móti ... Hvers vegna þurfa konur að líkjast karlmönnum þótt þær séu í ábyrgðarmikilli stöðu? Mega þær ekki vera kvenlegar? Kynin eru ólík og ég sé enga ástæðu fyrir að þær reyni endalaust að líkjast körlum.

[Berglind Steinsdóttir, 17.4.2007 kl. 21:06]

Já, og svo plataði gluggaveðrið mig svo illa í morgun að ég fór úr húsi í frekar stuttu pilsi og frekar þunnum sokkabuxum. Suma daga hefur verið hlýtt og gluggaveðrið verið raunveður. Í fyrramálið gái ég á mælinn líka, huhh.

[Svava S. Steinars, 17.4.2007 kl. 22:11]

Gluggaveður indeed !!  Ég sá fyrir mér fínt gönguveður í dag en þegar vinnan var búin og ég fór út kól ég næstum inn að beini á 10 sek.  Vor smor !

[Jenný Anna Baldursdóttir, 17.4.2007 kl. 23:18]

Takk fyrir pistil.  Við verðum að vera raunsæ með vorkomuna.  Vorið kemur í maí.